Werdigen, erbaren unde erszamen, wolwisen heren unde guden frunde. So denne de erliken radessendeboden van der Dutzschen hansze, ame jare 94 trinitatis negestvorleden bynnen Bremen tho dage vorgaddert weren, under anderen artikelen itlike artikele berecesset unde gesloten hebben besundergen de nederlage tho Berghen andrepende,1 dar wii one hoichliken vor dancken etc.
Derhalven, guden frunde, voge wii juw tho wetende, dat uppe desulven kopsteven des vorgerorden Der sake halven sint vorder tho Bergen gekomen anno etc. Des wy uns do myt hulpe der rykes redere hiir tor stede wesende tegen de vorgerorden heren schrifftliken purgerden unde entschuldighe[de]n, alse wii best konden; dat noch so steyt unde wy en weten nicht, iffte wy der sake allerdinge anich sin edder nicht.
Jodoch so moste heren Otte vorgescreven sodane gudere betalen unde weddergeven. Hiiruth mogen juwe erszamheide vormerken, wo id myt dessen dingen dorgesteken werdt; se krigen van den heren breve unde zegelen uth deme lande tho Holsten unde uth Vreszlant, unde de gesellen werden allike wol van den borgeren uth den steden uthgeredet unde sliten dergeliken sodane gudere, alse se mede bringen, wedder in den steden.
Wente alse wy underwiset sin, so schal de vorgerorde Hinrick Kummertho myt syner zelschup alle jar Hethlande myt kopenschup vorsoken unde sodane Hithlandesschen rotschere, alse se dar halen, vort tho Bremen, tho Stade unde darumme lanck her tho slitende plegen; dar denne de gude rotschere, alse van norden komet, mede vornichtiget unde vorvelschet wert, desser nedderlage tho vorfange unde mercklikeme schaden. Konden juwe erszambeyde eyn gud vorram hiirup vinden, dat sodant allerdinghe affgestellet worde, were gans nutte vor desse nedderlage unde dat gantze lanth; so gii myt der hulpe godes wol donde werden; dat vordene unde vorschulde wy umme juwe erszamheide, de god almechtich lange salich unde gesunt vristen mote, alle tiit willichliken gerne.
Gescreven under unseme des kopmans gemeynen ingesegel ame donnerdage na Ambrosii episcopi anno etc.
